अमेरिका – बलात्कार तया यौन उत्पीडनको आरोप लागेका हलिउडका चर्चित निर्माता हार्वी वाइनस्टिनलाई २३ वर्ष कैद सजायको फैसला सुनाइएको छ । न्युओर्कको एक अदालतले हार्वीलाई दोषी ठहर गर्दै सजाय सुनाएको हो ।

मिटु मुभमेन्टका बेला हलिउडकर्मी महिलाहरुले उनीमाथि यौन हिंसा गरेको आरोप लगाएका थिए । यसलाई मिटु मुभमेन्टसँग जोडिएका महिलाहरूले स्वागत गरेका छन् ।

यसअघि नै अदालतले दोषी ठहर गरेका हार्वीलाई वकिलहरुले अदालतमा फैसला घटाउन माग गरे पनि विपक्षमा खडा भएका वकिलहरूले हदैसम्मको सजाय हुनुपर्ने माग गरेका थिए ।

हार्वीलाई २५ वर्षसम्म जेल सजाय हुनसक्ने बताइएको थियो । उनीमाथि ८० महिलाले यौन उत्पीडनको आरोप लगाएका थिए ।

हलिउडका यी चर्चित निर्माताले गुड विल हन्टिङ्, द किङ्ग्स स्पीच र शेक्सपियर इन लभ लगायतका फिल्म निर्माण गरेका थिए । यता वाइन्सटिनले भने यी सबै आरोपको खण्डन गर्दै आएका थिए ।

हार्भीमाथि अभिनेत्री बन्न चाहने एक कलाकारलाई बलात्कार गरेको र सन् २००६ मा तत्कालीन उत्पादन सहायकलाई कुटेको आरोप समेत लागेको थियो । यही मुद्दामा अदालतले उनलाई दोषी ठहर गरेको हो ।