हेग– नेदरल्याण्ड्सका दुई शहरमा बम विष्फोट भएका छन् ।

स्थानीय समयअनुसार बुधबार बिहान ८ बजेको आसपास डच शहर आम्सटर्डामा रहेको एक कम्पनीको चिठिपत्र कक्षमा विष्फोट भएको डच सञ्चारमाध्यमले जनाएका छन् । आम्सटर्डामको स्लोटेर्डिक क्षेत्रमा भएको विष्फोटबाट सामान्य भौतिक क्षति भएपनि कुनै मानवीय क्षति भने नभएको डच अधिकारीले जनाएका छन् ।

आम्सटर्डाममा विष्फोट भएको आधा घण्टापछि नेदरल्याण्ड्सको दक्षिणी शहर केर्काडामा अर्को विष्फोट भएको थियो । केर्काडामा एउटा हुलाक कम्पनीमा विष्फोट भएको समाचार छ । यो विष्फोटमा पनि कुनै मानवीय क्षति नभएको जनाइएको छ ।

यी दुई विष्फोटमा लेटरबम अर्थात् चिठीमा राखिएको बम विष्फोट भएको हुनसक्ने प्रहरीको आशंका छ । यद्यपि यी दुई विष्फोट आपसमा सम्बन्धित रहे नरहेको बारे भने अनुसन्धान भइरहेको जनाइएको छ ।

यसअघि डिसेम्बर र जनवरी महिनामा पनि नेदरल्याण्ड्समा यस्ता लेटरबमको आतंक मच्चिएको थियो । त्यसबेला डच शहरहरु आम्सटर्डाम, रोटर्डाम, अटराइख्ट र मास्ट्रिख्टका ७ कम्पनीलाई धम्की पत्रसहित यस्ता बम पठाइएको थियो । तर, तीमध्ये कुनै पनि बम विष्फोट भएका थिएनन् ।