नयाँ दिल्ली– भारतको राजधानी दिल्लीमा भएको विधानसभा निर्वाचनमा भारी बहुमत प्राप्त गरेका आम आदमी पार्टीका नेता अरविन्द केजरीवालले आगामी फेब्रुअरी १६ अर्थात् आगामी आइतबार दिल्लीको मुख्यमन्त्रीको सपथ लिने भएका छन् ।

उनको सपथ ग्रहण समारोह रामलिला मैदानमा आयोजना हुने भारतीय सञ्चारमाध्यमले जनाएका छन् । आम आदमी पार्टी दिल्ली विधानसभाको चुनावमा दुई तिहाई बहुमतका साथ विजयी भएको थियो ।

आम आदमी पार्टी दिल्ली विधानसभाका ७० मध्ये ६२ सिटमा विजयी भएको थियो । केन्द्र सरकार चलाइरहेको रहेको भारतीय जनता पार्टीले भने केबल ८ स्थानमा विजय हासिल गरी दोश्रो भएको थियो ।

केजरीवाल तेस्रो पटक दिल्लीका मुख्यमन्त्री बन्न लागेका हुन् । केजरीवालको कार्यकाल सन् २०२५ सम्म रहनेछ ।