लामो समयदेखि क्यान्सर रोगबाट ग्रसित बलिउड अभिनेता ऋषि कपूरको फेरि समस्या देखिएको छ ।

केही हप्तापहिले स्वास्थ्य अवस्था बिग्रेका कारण ऋषिलाई अस्पताल भर्ना गरिएको थियो । अस्पतालले छिट्टै नै उनलाई डिस्चार्ज गरेको थियो । लगत्तै परिवारले ऋषिलाई प्रदूषणका कारण इन्फेक्सन भएको जनाएको थियो ।

यतिबेला फेरि ऋषिलाई अस्पताल भर्ना गरिएको छ । उनी बारम्बार बिरामी भए पनि गम्भीर समस्या नदेखिएको जनाइएको छ ।

भारतीय मिडियाले सूत्रको हवाला दिँदै ऋषिको स्वास्थ्य अवस्थाका कारण परिवार चिन्तित भएको लेखेका छन् ।

उनलाई गत वर्ष अमेरिकाको न्यूओर्कमा उपचारका लागि लगिएको थियो । उपचारपछि उनलाई भारत ल्याइएको थियो ।

झण्डै एक वर्ष क्यान्सरको उपचार गराएर मुम्बई फर्किएका ऋषि कपूरले एक हलिउड फिल्मको रिमेकमा काम गर्दैछन् । उक्त फिल्ममा दीपिका पादुकोण पनि हुनेछिन् ।