बर्दिया- ठाकुरबाबा नगरपालिकाले राहतको सट्टा रोजगारी दिने योजना ल्याएको छ।

लकडाउनका कारण रोजगारी गुमाएका र साँझ बिहानको छाक टार्न मुस्किल हुने वर्गलाई लक्ष्य गरी स्थानीय तहभित्रै रोजगारीको अवसर दिने नगरप्रमुख घननाराण श्रेष्ठले जानकारी दिएका हुन् ।

रोजगारको योजनामा आबद्ध हुन नगरपालिकाले सोमबारदेखि ५ दिने सूचना जारी गरेको छ। नगरपालिकाका ९ वटै वडामा सञ्चालन गरिने बताइएको छ। रोजगार योजनामा एक घरबाट एक व्यक्ति समावेश गराइने बताइएको छ।

रोजगारीका लागि आवेदन दिने व्यक्ति स्वयम नै रोजगारमा सहभागी हुनुपर्ने, १६ वर्ष पूरा भई ५९ वर्ष ननाघेको, प्रधानमन्त्री रोजगार कार्यक्रममा नभएका परिवारका व्यक्तिलाई रोजगार योजनामा समावेश गराइने प्रशासकीय अधिकृत रामहरि रिजालले बताए।

रोजगारमा सहभागी हुने व्यक्तिले वडा कार्यालयले तोकेको काम गर्नुपर्ने उल्लेख गरिएको छ ।

लकडाउनका कारण रोजगार गुमाएका घरपरिवारमा खाद्यसंकट टार्न वडास्तरमै रोजगारीका योजना ल्याइएको नगरप्रमुख श्रेष्ठले बताए।