काठमाडौं– आफूलाई मिर्गौला दिएकी भाञ्जी समिक्षा संग्रौलासँग प्रधानमन्त्री केपी शर्मा ओलीको भेट भएको छ ।

भाञ्जीको मिर्गौला आफ्नो शरीरमा प्रत्यारोपण गरेको सात दिनपछि प्रधानमन्त्री ओलीले संग्रौलालाई भेटेका हुन् ।

अस्पतालबाट आजै डिस्चार्ज हुनुअघि संग्रौला र प्रधानमन्त्री ओलीबीच आज भेट भएको थियो ।

भेटमा प्रधानमन्त्री ओलीले मिर्गौला दिएकोमा भाञ्जी संग्रौलालाई धन्यवाद दिएका थिए भने उनको स्वास्थ्य अवस्थाबारे पनि जानकारी लिएका थिए ।

‘प्रधानमन्त्री ज्यूले उहाँ(संग्रौला) लाई धन्यवाद दिनुभयो र उहाँको स्वास्थ्य अवस्थाबारे सोध्नु भयो’स्रोतले भन्यो,‘समिक्षाले पनि प्रधानमन्त्रीको स्वास्थ्य अवस्थाबारे सोध्नु भएको थियो ।’

प्रधानमन्त्री केपी शर्मा ओलीको दोस्रोपटक मिर्गौला प्रत्यारोपण गरिएको हो । प्रत्यारोपित मिर्गौलाले राम्रोसँग काम गरेको र प्रधानमन्त्रीको स्वास्थ्य अवस्था सुधारउन्मुख रहेको चिकित्सकहरुले बताएका छन् ।

प्रधानमन्त्री ओलीलाई आजै डिस्चार्ज गर्ने तयारी गरिएको छ ।