काठमाडौँ- प्रमुख प्रतिपक्षी नेपाली कांग्रेसले नेत्रविक्रम चन्द ‘विप्लव’ समूहलाई बर्बरता छाडेर शान्तिपूर्ण मार्गमा आउन आग्रह गरेको छ।

सभापति शेरबहादुर देउवा निवास बुढानिलकण्ठमा बिहीबार बसेको पदाधिकारी र पूर्वपदाधिकारी बैठकले मोरङमा विप्लव समूहले गरेको शिक्षक हत्याको विरोध जनाउँदै यस्तो आग्रह गरेको प्रवक्ता विश्वप्रकाश शर्माले जानकारी दिए।

घटनामा संलग्नलाई कारवाहीको माग गरिएको पनि शर्माले बताए । विप्लव समूहले शिक्षक राजेन्द्र श्रेष्ठको हत्या गरेको थियो।

बैठकमा मंसिर २९ गते हुने देशव्यापी प्रदर्शनमा नेता तथा कार्यकर्ता परिचालन गर्ने निर्णय पनि गरेको छ । विरोध प्रदर्शनलाई सफल बनाउन नेता तथा कार्यकर्तालाई सडकमा आउन उसले अपिल पनि गरेको छ ।

सरकारविरुद्धको विरोध प्रदर्शनमा सरकारलाई दबाब दिन चाहाने आफ्ना सम्पूर्ण शुभचिन्तक,नेता कार्यकतालाई सडकमा आउन अपिल गर्ने निर्णय गरिएको शर्माले जानकारी दिए ।

कोरोना महामारीमा पनि सरकार सत्ताको द्वन्द्वमा नै केन्द्रित रहेको र वर्तमान सरकार गठन भएपछि झनै भ्रष्टाचार बढ्दै गएकाले सरकारकाविरुद्ध सडकमा उत्रन आह्वान गरिएको उनले बताए ।

गत मंसिर १७ गते तनहुँमा पुल उद्घाटनको विषयमा विवाद हुँदा बरिष्ठ नेता रामचन्द्र पौडेललाई प्रहरीले नियन्त्रण गरेपछि सरकारविरुद्ध कांग्रेस आक्रामक भएको हो ।

पूर्वनिर्धारित कार्यक्रमअनुसार पुल उद्घाटन गर्न अवरोध गरेको भन्दै कांग्रेसले २९ गते देशैभर प्रदर्शन गर्न लागेको हो ।