मुम्बई – बलिउड कलाकार सुशान्त सिंह राजपूतको आत्महत्यापछि उनकी प्रेमिका रिया चक्रवर्ती विवादमा तानिएकी छिन् ।
सुशान्तको आत्महत्या ड्रग्सतर्फ सोझिएपछि नारकोटिक्स सेन्ट्रल ब्यूरो (एनसीबी) ले यो घटनामाथि छानबिन गरिरहेको छ । तीन दिन सोधपुछ गरेपछि रियालाई एनसीबीको टोलीले पक्राउ गरेको छ ।
मंगलवार पक्राउ परेकी रियाको एक ट्वीट यतिबेला सामाजिक सञ्जालमा भाइरल भइरहेको छ । जबकि, सुशान्तको मृत्युपछि रिया सामाजिक सञ्जाल प्रयोगकर्ताको तारो बन्दै आइरहेकी छिन् ।
सन् २०१९ मा रियाले गरेको ट्वीट बिहीवार भाइरल भयो । उक्त ट्वीटमा रियाले ड्रग्सका बारेमा उल्लेख गरेकी छिन् ।
‘एक भारतीय युवतीको डरलाग्दो कहानी पढें, जसमा मादक पदार्थ तस्करीका कारण साढे चार वर्ष जेलको सजाय काटिन्,’ रियाले उक्त ट्वीटमा भनेकी छिन् ।
just stepped out of a weird scary engrossing story of an indian girl ….who served 4 n a half year jail sentence for narcotic trafikking,,
— Rhea Chakraborty (@Tweet2Rhea) November 19, 2009
रियाको उक्त ट्वीटमा यतिबेला कैयन् प्रतिक्रिया आएका छन् । एक प्रयोगकर्ताले लेखेकी छिन्, ‘कसलाई थाहा थियो, रियाले आफ्नै बारेमा भनिरहेकी थिइन् भनेर ।’
सुशान्त सिंह राजपूत गत १४ जुनमा मुम्बईस्थित आफ्नो फ्ल्याटमा मृत अवस्थामा भेटिएका थिए । पोस्टमार्टम रिपोर्टमा घाँटीमा पासो लगाउँदा मृत्यु भएको भनिएको थियो ।
उनको निधनपछि बलिउडमा नेपोटिज्मको विषयमा पनि व्यापक बहस भएको थियो ।
सुशान्तका बुबाले रियालाई दोषी देखाउँदै आर्थिक लेनदेनका लागि सुशान्तको ज्यान लिएको आरोप लगाउँदै बिहार प्रहरीमा उजुरी दिएका थिए ।
त्यसपछि रियाविरुद्ध बिहार प्रहरी, सीबीआई र इडीले अनुसन्धान गरेको थियो । अनुसन्धानका क्रममा सुशान्त र रियाबीच ड्रग्स कनेक्सन देखिएपछि रियालाई एनसीबीले पक्राउ गरेको हो ।
प्रतिक्रिया