काठमाडौं- लकडाउनकै समयमा पनि मनाङमा विकास निर्माणका काम धमाधम भइरहेको छ ।

लकडाउनमै पर्यटन पदमार्गदेखि स्वास्थ्यचौकी भवनसम्मको निर्माण कार्य भइरहेको छ । लकडाउनमा बाहिरी जिल्लाका मजदुर आउन समस्या भए पनि स्थानीय युवा परिचालन गरी विकास निर्माणका काम भइरहेको छ ।

मनाङ प्रवेश नाका नासों गाउँपालिका–१ ताल हुँदै वडा नं २ नाँचेगाउँसम्म पदमार्ग निर्माणको काम चलिरहेको वडा नं १ का वडाध्यक्ष झलकबहादुर गुरुङले बताए । वडा नं १ बाट शुरु भएको विकास निर्माणका काम अन्य वडासम्म पुग्ने अध्यक्ष गुरुङले बताए ।

उनका अनुसार पार्क निर्माण, ताम्राङ पुलदेखि वडा नं ६ र ७ सम्म जोड्दै पदमार्ग भीमताङसम्म चार हजार मिटर उचाइमा रहेको ड्रोनाताल जोड्ने पदमार्गमा रेलिङ निर्माणको काम भइरहेको वडा नं २ का वडाध्यक्ष भीमबहादुर गुरुङले बताए। अन्य वडामा पनि कामले तीव्रता पाइरहेको छ ।

गाउँपालिकाका सबै वडामा आवश्यक योजना निर्माण र उपभोक्ता समितिको मातहतमा काम भएको गाउँपालिका अध्यक्ष चन्द्र घलेले जानकारी दिए । उनका अनुसार मनाङ पर्यटकीयस्थल भएकाले पनि लकडाउनको समयमा पदमार्ग निर्माण गर्न सहज भएको छ ।

मनाङमा विभिन्न विकास निर्माणका काम लकडाउनको समयमा तयार गर्न नसके पर्यटक भित्रिने समयमा समस्या हुने अवस्थालाई मध्यनजर गर्दै विकास निर्माणका कामलाई तीव्रता दिएको अध्यक्ष घलेको भनाइ छ । विकास निर्माणकै समयमा पदमार्गलगायत काम बनाउँदा भविष्यलाई समेत टेवा पुग्ने भएपछि धमाधम निर्माणको काम गरिएको घलेको भनाइ छ ।