लण्डन– सन् १९०८ मा जन्मेका बब वेइटन विश्वकै बयोबृद्ध मानिस हुन् । बेलायती नागरिक उनलाई यतिबेला भने कोरोना भाइरसको प्रकोपले चिन्तित तुल्याएको छ । कोरोनाबाट बृद्धबृद्धालाई धेरै असर पार्ने भएका कारण उनी अन्य बृद्धबृद्धाको स्वास्थ्यप्रति चिन्तित बनेका छन् ।

हाल दक्षिणी बेलायतको अल्टोन शहरमा बसोबास गर्दै आएका उनले आफूले नियमित सरसफाईमा पहिले भन्दा धेरै ध्यान दिने गरेको समेत बताए । आजकल उनले नियमित हात धुने र ब्रसले नङ सफा गर्ने गरेका बेलायती सञ्चारमाध्यमले जनाएका छन् ।

उनलाई व्यक्तिगत रुपमा भने त्यति चिन्ता छैन । ‘म आफ्नै स्वास्थ्यप्रति चिन्तित हुनपर्ने हो, तर म त धेरै लामो समयसम्म बाँचिसकेँ । मेरा छोराछोरी र नातिनातिनाबारे चाहिँ मलाई धेरै चिन्ता लाग्छ,’ बेलायती सञ्चारमाध्यमले उनलाई उद्धृत गर्दै लेखेका छन् ।

उनले आजभन्दा करिब १ सय वर्षअघि विश्वभर फैलिएको स्पेनिश फ्लूको महामारी पनि भोगिसकेका छन् । उनका अनुसार कोरोना भाइरसको प्रकोप स्पेनिश फ्लूभन्दा खतरनाक छैन । उक्त महामारीबाट विश्वभर ५ देखि १० करोड मानिसहरुको ज्यान गएको थियो ।

आगामी मार्च २९ मा ११२ वर्ष पुग्न लागेका वेइटनलाई गिनिज बुकले संसारकै बयोबृद्ध मानिस घोषणा गर्न लागेको बताइएको छ । यसअघिका जापानका चिसेत्सु वातानाबेलाई गिनिज बुकले बयोबृद्ध मानिसको घोषणा गरेको केही दिनभित्रै उनको मृत्यु भएपछि वेइटनको नाममा नयाँ कीर्तिमान बन्न लागेको हो ।