काठमाडौँ – भारतीय विदेश मन्त्री एस जयशंकरले भगवान गौतम बुद्ध भारतीय नागरिक नै रहेको दाबी गरेका छन्।

शनिबार भारतीय उद्योगी तथा व्यवसायीहरुको संगठन कन्फडरेशन अफ इन्डियन इन्डस्ट्रिले आयोजना गरेको भर्च्युअल सम्मेलनलाई सम्बोधन गर्दै जयशंकरले गौतम बुद्धलाई ‘महान् भारतीय नागरिक’ भएको दाबी गरेका हुन् ।

‘हामीले भारतीय इतिहासमा सबैभन्दा महान नागरिकका रूपमा स्मरण गर्ने दुईजना छन् । एक गौतम बुद्ध र अर्को महात्मा गान्धी । हामीले मात्रै होइन पूरा विश्वले उहाँहरूलाई महान् भारतीयका रुपमा चिन्छ,’ जयशंकरले भने ।

नेपालको संसदमा विशेष सम्बोधन गर्ने क्रममा भारतीय प्रधानमन्त्री नरेन्द्र मोदीले ६ वर्ष पहिले बुद्ध नेपाली रहेको र उनले विश्वमा शान्तिको सन्देश प्रवाह गरेको बताएका थिए।

तर, उनले त्यसपछि अर्थात दुई वर्षअघिको बुद्ध पूर्णिामामा भारत बुद्धको भूमि रहेको बताएका थिए। भारतले गर्दै आएको यस्तो दाबीलाई नेपालले विरोध गर्दै आएको छ । प्रधानमन्त्री केपी शर्मा ओलीले भगवान् राम नेपालकै भएको अभिव्यक्ति दिएपछि भारतले फेरि एक पटक बुद्धबारे दाबी गरेको हो ।