काठमाडौं – भारतमा सर्वाधिक खोजीको सूचीमा रहेका ग्याङस्टर विकास दुबे पक्राउ परेका छन् । गत साता आठ सुरक्षाकर्मी मारिएको घटनामा संलग्न भएको आरोपमा उनलाई प्रहरीले पक्राउ गरेको हो ।

गत शुक्रवार उत्तर प्रदेशको कानपुरमा दुबेले नेतृत्व गरेको एउटा आपराधिक समूहलाई पक्राउ गर्न जाँदा ८ प्रहरी मारिएका थिए ।

उक्त हमलापछि दुबे भारतीय प्रहरीको सर्वाधिक खोजी सूचीमा रहेका थिए । एक सातादेखि फरार रहेका उनलाई मध्यप्रदेशको एक मन्दिरबाट प्रक्राउ गरिएको भारतीय मिडियाले उल्लेख गरेका छन् ।

भारतीय सञ्चार माध्यमले उनी नेपाल छिरेको हुनसक्ने आँकलन गरेका थिए । प्रहरीले बुधवार दुबेका केही सहयोगीलाई पक्राउ गरेको थियो भने केही मारिएका थिए ।

दुबेमाथि हत्या, अपहरण र फिरौती उठाउने घटनामा सङ्लग्न भएको आरोप छ । उनीमाथि ६० वटाभन्दा बढी अभियोग छन् ।

यसअघि दुबे पक्राउ परे पनि राजनीतिक शक्तिका आडमा छुट्ने गरेका थिए ।