बलिउडका पुराना हस्ती अमिताभ बच्चनले समाजिक सञ्जालमा हालै एक अनुभव सेयर गरेका छन् ।

सुजित सरकारको फिल्म गुलाबो सिताबोमा काम गर्दाको अनुभवलाई अभिताभले सेयर गरेका हुन् । उनले लखनऊको गर्मीमा गुलाबो सिताबोको सुटिङमा अत्यधिक प्रोस्थेटिक्स पहिरिएर अभिनय गरेको अनुभवलाई तस्वीरसहित शेयर गरेका हुन् ।

उनले सेयर गरेको तस्वीरमा लेखेको शब्दको नेपाली भाव यस्तो छ । यस तस्वीरमा जुन ड्रेस मैले पहिरिएको छु खासमा त्यो पछिल्तिरबाट खुल्ला छ । यो एक प्रकारको निर्देशकको इनपुट हो । किनकी लखनऊको ५० डिग्रीको उखरमाउलो गर्मीमा काम गर्दा मलाई बारम्बार कपडा बदल्नु पर्ने आवश्यक हुन्थ्यो । यस्तोमा प्रोस्थेटिक्स र कपालका साथ माथिबाट कपडा खोल्न मुस्किल हुन्थ्यो । जसका लागी ड्रेस वा कपडा बिना शीरको माध्यमबाट सिधै पछाडीबाट खोल्न सकिन्थ्यो ।

अमिताभका अनुसार यस फिल्मका लागी बिहानै तयार हुनुपर्दथ्यो । गर्मीले मेकअप उत्रिने जोखिम रहेकाले शरीरलाई चिसो बनाउन अत्यन्त आवश्यक हुन्थ्यो । गुलाबो सिताबोको प्रिमियर १२ जुनमा अमेजन प्राइम भिडियोबाट हुनेछ । फिल्ममा आयुष्मान खुराना, बिजय राज, बिजेन्द्र काला, नलिश निल, सुनिल बटोलिया, टिना भाटिया, सृष्टि श्रीवास्तव लगायतका कलाकार छन् ।