ललितपुर- ललितपुर महानगरपालिकाले कोरोना भाइरसको संक्रमण फैलन नदिन लम्बिएको लकडाउनमा कोही पनि भोकै नपरुन भन्दै समस्यामा परेकालाई न्यूनतम राहत सामग्री स्वरुप दाल र चामल दिने भएको छ ।

सामूहिक भोजन (मेस) बन्द गरेर अति विपन्न , असहाय , दैनिक ज्यालादारी र अपागंता भएका व्यक्ति र तिनका परिवारलाई लकडाउनको समयमा खाद्यान्न अभाव नहोस् भन्दै न्यूनतम राहत उपलब्ध गराएको महानगरले जनाएको छ ।

महानगरले एक विज्ञप्ति जारी गरी राहत आवश्यक पर्नेले वडा अध्यक्षसँग सम्पर्क गर्न समेत अनुरोध गरेको छ ।

कोहिपनि भोकै बस्ने अवस्था नहोस भनेर यो व्यवस्था गरिएको ललितपुर महानगरपालिका प्रमुख चिरीबाबु महर्जनले बताए ।

यसअघि महानगरले लगभग सबै वडामा १५ दिनभन्दा धेरै दिन मेस चलाएको थियो । ललितपुर महानगरपालिकाले लकडाउन सुरु भए लगत्तै जी टु जी प्रक्रिया मार्फत साल्ट ट्रेडिङ कर्पोरेसनबाट खाद्य सामग्री खरिद गरेर वडाहरुमा राहत वितरण गरेको थियो ।