काठमाडौं – प्रधानमन्त्री केपी शर्मा ओली अस्पतालबाट डिस्चार्ज भएलगत्तै गभर्नर नियुक्तिको प्रक्रिया सुरु हुने भएको छ।

ओलीको डिस्चार्जसँगै बस्ने पहिलो मन्त्रीपरिषद् बैठकले गभर्नर सिफारिस समिति गठन गर्नेछ।

अर्थमन्त्री संयोजक हुने ३ सदस्यीय समितिमा अन्य दुई जना पूर्वगभर्नर र एक जना वित्तीय क्षेत्रका अनुभवी ब्यक्ति हुनेछन्। समितिले तीन जनाको नाम सिफारिस गर्नेछ । तीन जनामध्ये एक जनालाई मन्त्रीपरिषद्ले गभर्नरमा नियुक्त गर्नेछ।

तीन जनामध्ये एक जना बहालवाला डेपुटी गभर्नरबाट नाम सिफारिस गर्नुपर्ने ब्यवस्था छ। अहिलेका गभर्नर डा.चिरञ्जिबी नेपालको कार्यकाल आगामी चैत ५ गते सकिँदैछ।

सामान्यतया गभर्नर अवकाश हुनुअघि नै नयाँ गभर्नर सिफारिस गरिने प्रचलन रहँदै आएको छ । गभर्नरका लागि अहिले डेपुटी गभर्नर चिन्तामणि शिवाकोटी, महाप्रसाद अधिकारी, डा.मीनबहादुर श्रेष्ठ, राजन खनाल, डा. सुवोधकुमार कर्ण, लालशंकर घिमिरेको नाम चर्चामा छ।