सुनसरी- अख्तियार दुरुपयोग अनुसन्धान आयोगले नेपाली काँग्रेसका उप-सभापति एवं संसदीय दलका उप-नेता विजयकुमार गच्छदारविरुद्ध विशेष अदालतमा भ्रष्टाचारको मुद्धा दायर गरेको विरोधमा सुनसरीमा प्रदर्शन गरिएको छ ।

नेता गच्छदारको गृहनगर सुनसरीमा कांग्रेसका कार्यकर्ताहरुले मशाल जुलुस प्रदर्शन गरेका हुन् । तरुण दल सुनसरीको नेतृत्वमा भएको विरोध प्रदर्शनमा दुहबिका विभिन्न बाईपास सडकबाट एकैसाथ हजारौंको संख्यामा काँग्रेस कार्यकर्ता, तरुण नेता तथा कार्यकर्ता र गच्छदार समर्थकहरुको मसाल जुलुसमा सहमागी भएका थिए ।

दुहबी नगर प्रमुख बेदनारायण गच्छदारले ललिता निवास जग्गा प्रकरणमा नेपाली काङ्ग्रेस पार्टी उपसभापति बिजयकुमार गच्छदार मुछिएको विषयलाई राजनीतिक प्रतिशोधको संज्ञा दिँदै आन्दोलनको तयारी थालेको बताएका छन् ।

उनले सरकार दुई तिहाईको दम्भ देखाएर सुनियोजित तवरले लगाइएकाे मुद्दा फिर्ता नलिए वर्तमान सरकारविरुद्ध सडक संघर्षको विकल्प नहुने बताए ।

नेपाली काङ्ग्रेस सुनसरी क्षेत्र नम्बर ३ का सभापति मेंहदी हुसैनले सुनसरी क्षेत्र नम्बर ३ बिजय गच्छदारको राजनीतिक कर्मथलो समेत भएकाले आन्दोलनकालागि २१ सदस्य कमिटि तयार भएकोले चाँडै नै चरणबद्ध आन्दोलनका कार्यक्रमहरु सार्वजनिक गरिने जानकारी दिए ।

नेपाल तरुण दल सुनसरी जिल्ला कार्य समितिले समेत गच्छदारमाथि लगाइएको आरोपविरुद्ध आन्दोलनमा होमिनु बाहेकको विकल्प नरहेको जनाएको छ ।