काठमाडाैँ– अस्ट्रेलियाविरुद्धको तेस्रो तथा अन्तिम टी–ट्वान्टी क्रिकेटमा भारत १२ रनले पराजित भएको छ।

घरेलु मैदान सिड्नीमा भएको खेलमा अस्ट्रेलियाले दिएको १ सय ८७ रनको लक्ष्य पछ्याउँदै जवाफि ब्याटिङमा उत्रिएको भारतले निर्धारित ओभरमा ७ विकेटको क्षतिमा १ सय ७४ रनमात्रै बनाउन सक्यो।

भारतका लागि कप्तान विराट कोहलीले सर्वाधिक ८५ रनको योगदान दिए लक्ष्य भेटाउन सकेनन् ।

यस्तै शिखर धवन २८, हार्दिक पाण्डे २० रनमा आउट हुँदा केएल राहुल र श्रेयस ऐर शून्य रनमा पेभेलियन फर्किएका थिए ।

अस्ट्रेलियाका मिचेल स्विपसनले ३ विकेट लिए भने ग्लेम म्याक्सवेल, सियन अबोट, एन्ड्रयु टाइ तथा अडम जम्पाले १/१ विकेट लिए।

यसअघि टस हारेर पहिले ब्याटिङ गरेको अस्ट्रेलियाले निर्धारित ओभरमा ५ विकेटको क्षतिमा १ सय ८६ रन बनाएको थियो।

अस्ट्रेलियाका लागि म्याथु वेडले सर्वाधिक ८० रन बनाएका थिए भने म्याक्सवेल ५४ तथा स्टिभ स्मिथ २४ रनको योगदान दिए ।

भारतका लागि वासिंगटन सुन्दरले २ विकेट लिएका थिए । टी नटराजन तथा सार्दुल ठाकुरले १/१ विकेट लिए। यसअघि दुई खेलमा पराजित भएको अस्ट्रेलिया भने सान्त्वना जित निकाल्दै टी–टवान्टी सिरिज अन्त्य गरेको छ ।