काठमाडौँ– सरकार र डाक्टर गोविन्द केसीका प्रतिनिधिबीचको वार्ता फेरि शुरु भएको छ ।

बिहीबार दिउँसो २ बजे स्थगित भएको वार्ता शिक्षा मन्त्रालयमै पुन: शुरु भएको डा केसीतर्फबाट वार्तामा सहभागी डाक्टर अञ्जनी कुमार झाले खबरहबलाई बताए ।

शिक्षा मन्त्रालयले बुधबार डा केसीका मागका विषयमा वार्ता गर्न टोली गठन गरेपछि डा केसीको तर्फबाट सरकारसँग वार्ता गर्न टोली गठन भएको थियो ।

दुवै पक्षबीच आज बिहानदेखि दिउँसोसम्म करिव ४ घण्टा वार्ता चलेको थियो ।

शिक्षा सचिव गोपीनाथ मैनाली दक्षिण एसियाली क्षेत्रीय सहयोग संगठन सार्कका शिक्षामन्त्रीहरुको भर्चुअल बैठकमा सहभागी भएकाले डा केसीका प्रतिनिधिसँगको वार्ता दिउँसो दुईबजे स्थगित गरिएको थियो ।

पछिल्लो बैठक ४ बजे बस्ने भनेपनि डा केसीका प्रतिनिधिहरु यसअघि भएका छलफलको विषयमा डा केसीलाई जानकारी गराउन त्रिवि शिक्षण अस्पताल पुगेका थिए । डा केसीको तर्फबाट वार्ता गर्न गठित टोली शिक्षा मन्त्रालय पुगेपछि वार्ता पुन: शुरु भएको हो ।

यसअघि भएको वार्तामा सरकारले डा केसीलाई आफ्नो अडान तथा मागप्रति लचिलो हुन आग्रह गरेका छन् भने डा केसी आफ्नो सबै तत्काल पुरा हुनुपर्ने अठानमा छन् ।

वार्ता टोलीमा सरकारको तर्फबाट शिक्षा सचिव गोपीनाथ मैनाली, स्वास्थ्य मन्त्रालयका सहसचिव डाक्टर गुणराज लोहनी र चिकित्सा शिक्षा आयोगका निर्देशक डाक्टर दिलीप शर्मा रहेका छन् भने डा केसीका प्रतिनिधिहरुमा डा जीवन क्षेत्री, डाक्टर अञ्जनी कुमार झा, डा लोचन कार्की र अधिवक्ता ओम प्रकाश अर्याल छन् ।

डा केसीले चिकित्सा शिक्षा सुधारका विभिन्न मागहरु राख्दै भदौं २९ गतेदेखि जुम्लाबाट अनसन शुरु गरेका थिए । डा केसी हाल त्रिवि शिक्षण अस्पताल महाराजगंजमा अनसनरत छन् । उनको निगरानीमा खटिएका चिकित्सहरुले डा केसीको स्वास्थ्य अवस्था जटिल बन्दै गएको बताएका छन् ।