काठमाडौं– राष्ट्रिय जनता पार्टीका नेतासमेत रहेका सांसद राजेन्द्र महतोले वर्तामान दुई तिहाइको सरकार दुई कौडीको भएको आरोप लगाएका छन् ।

शुक्रबारबाट शुरु भएको बजेट अधिवेशनमा नेता महतोले दुई तिहाइको सरकारले जनताका लागि दुई कौडीको पनि काम नगरेको अरोप लगाएका हुन् ।

दुई तिहाइको सरकारबाट जनताले ठूलो अपेक्षा गरेको भएपनि सरकारले जनातकोलागि काम गर्न नसकेको उनको आरोप थियो ।
सरकारको ध्यान अरुको पार्टी फुटाउने तर्फ रहेको उनको भनाइ थियो ।

जनता महामारीबाट पीडित रहेको बेलामा सरकार भ्रष्टाचार र अरुको पार्टी फुटाउन लागेको आरोप लगाए । उनले सरकार आफैं सांसदको अपहरणमा लागेको आरोप लगाए ।

‘जनता महामारीबाट मरिरहेको छ। पीडित छ। खान पाएको छैन। उपचार पाएको छैन। स्वास्थ्य सामाग्री पाएको छैन। यहाँ त अर्कै धन्दा भैराखेको छ’ उनले भने,’ सरकार अर्को धन्दामा पो लागेको रहेछ। पार्टी फोड्ने ? सांसद जोड्ने धन्दामा जनताको पीडा कम हुन्छ ? अपहरण गर्ने ? सांसद अपहरण गर्ने ? के हो यो ?’

उनले कोरोना भाइरसबाट जनता त्रसित भएको भन्दै परीक्षणको दायरालाई बढाउन माग गरे । परीक्षण कम भएका कारण संक्रमितको संख्या कम भएको भएपनि सरकारी पक्षले जम्मा १०१ जना त हो नि भन्ने गैर जिम्मेवार अभिव्यक्ति दिएको उनको आरोप थियो ।
कछुवागतिमा भइरहेको परीक्षण बढाउनुपर्ने उनले बताए ।

‘एकै परिवारका १७ जनालाई देखिएको छ’, महतोले भने, ‘दलका नेताले भन्दियो १०१ न हो संक्रमित। कति गर्‍यो जाँच ? विदेशबाट आएका जतिको जाँच गर्‍यो ? छैन। एउटा परिवारबाट १७ निस्कन्छ। कछुवाको गतिमा कोरोना टेस्ट गर्ने अनि छैन भनेर पीठ थपथपाउने। यो धन्दा ठिक भएन। व्यापक परीक्षण गराउनुपर्छ’ उनले भने ।