काठमाडौं– मोरङ र बारामा गरी भएका छुट्टा–छुट्टै सवारी दुर्घटनामा परी २ जनाको मृत्यु भएको छ ।

मोरङको कानेपोखरी गाउँपालिका-७ मा को २५ प ३८८९ नम्बरको मोटरसाइकलले बिहीबार दिउँसो ठक्कर दिँदा १ जना पैदल यात्रीको मृत्यु भएको छ ।

मोटरसाइकलले ठक्कर दिएर मृत्यु हुनेमा बेलबारी नगरपालिका-८ बस्ने पैदलयात्री ४० वर्षीया शान्ता राजवंशी छिन् । दुर्घटनामा गम्भीर घाइते भएकी उनलाई उपचारका लागि मंगलबारे अस्पताल उर्लाबारी लैजाने क्रममा बाटोमै मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।

यस्तै, बाराको महागढीमाई नगरपालिका-१० मा कल्डर्टमा ठोक्किएर लडिरहेको ना ४६ प ३६५९ नम्बरको मोटरसाइकललाई गाडीले ठक्कर दिँदा बिहीबार राति दुर्घटना हुँदा १ जनाको मृत्यु भएको छ ।

कलभर्टमा ठोक्किएर सडक छेउमा लडेको मोटरसाइकललाई प्रदेश २-०३-००१ च ४८४ नम्बरको गाडीले ठक्कर दिँदा मोटरसाइकल चालक सोही नगरपालिका-१० बस्ने २५ वर्षीय पशुराम प्रसाद यादव गम्भीर घाइते भएका थिए ।

घाइते भएका उनलाई उपचारको लागि कलैयातर्फ लैजाने क्रममा बाटोमै मृत्यु भएको जिल्ला प्रहरी कार्यालय बाराले जानकारी दिएको छ । ठक्कर दिने गाडी चालकलाई प्रहरीले नियन्त्रणमा लिएको छ ।