काठमाडौं- अन्तर्राष्ट्रिय मैत्रीपूर्ण खेलका लागि बंगलादेश पुगेको नेपाली टोलीले आइतबारबाट अभ्यास शुरु गर्ने भएको छ ।

बंगलादेशमा सबै नेपाली खेलाडीकाे पीसीआर परीक्षणको रिपोर्ट नेगेटिभ आएपछि उनीहरु अभ्यासमा जुट्ने भएका हुन् ।

शुक्रबार भएको कोरोना जाँचको रिपोर्ट शनिबार बेलुकी आएको हो। जसमा सबै खेलाडी, अफिसियलदेखि नेपाली संचारकर्मीको समेत नतिजा नेगेटिभ आएको हो।

कोरोनाको नतिजा आएसँगै नेपाली टोलीले आइतबार बेलुकादेखि अभ्यास सुरु गर्नेछ । अभ्यास कुन मैदानमा हुने भन्ने भने अहिलेसम्म टुंगो लागिसकेको छैन।

बंगलादेश जानु अगाडि ७ जना खेलाडीलाई कोरोना देखिएको थियो। कोरोना संक्रमण देखिएका खेलाडीहरु काठमाडौंमा आईसोलेसनमा बसेका छन्।

नेपालले बंगलादेशसँग १३ र १७ नोभेम्बरमा दुई वटा मैत्रीपूर्ण खेल खेल्नेछ। झण्डै १ वर्षपछि नेपाल अन्तर्राष्ट्रिय खेल खेल्दैछ।