काठमाडौं- प्रमुख प्रतिपक्षी दल नेपाली कांग्रेसले अनसनरत युवाहरुको मागमा गम्भीर बन्न सरकारलाई आग्रह गरेको छ ।

शुक्रबार विज्ञप्ति जारी गर्दै प्रवक्ता विश्व प्रकाश शर्माले युवाहरु अनशनमा बसेको बीस दिन पूरा भई सक्दा समेत संवाद र समाधानका लागि सरकार गम्भीर नदेखिनु दुखद भएको बताएका छन् ।

उनले युवाहरुका माग जायज रहेको बताउँदै तत्काल पूरा गर्न आग्रह गरेका छन् ।

‘विभिन्न माग राखेर राजधानीमै युवाहरू आमरण अनशनमा बसेका छन्। त्यही माग अघि सारेका छन् जो विगतदेखि दल र सञ्चार माध्यमहरुले उठाउँदै आएका थिए’ प्रवक्ता शर्माले भनेका छन्, ‘सरकार स्वयंले अघिल्लो अनशनमा स्वीकारेर गरेको सम्झौता पालना गर्न दबाब दिइरहेका छन्। तर अनशनमा बसेको बीस दिन पूरा भई सक्दा संवाद र समाधानका लागि सरकार गम्भीर नदेखिनु अत्यन्तै दुःखद छ।’

कोरोना विरुद्धको संघर्षमा युद्धस्तरमा कार्य गर्न प्रमुख प्रतिपक्षी दल नेपाली कांग्रेसले शुरुवात देखिनै विभिन्न सुझाव र माग अघि सार्दै आएको प्रवक्ता शर्माले स्मरण गराएका छन्।