नेपालगञ्ज– नेपालगञ्जको निषेधित क्षेत्र भोलिदेखि केही खुकुलो बनाइने भएको छ ।

भोलि(शुक्रबार) देखि विहान ११ बजेबाट दिउँसो ३ बजेसम्म अत्यावश्यक सामग्री किनमेलका लागि पसलहरु खोल्न दिइने भएको छ ।

जिल्ला प्रशासन कार्यालय बाँकेमा आज बसेको सर्वदलीय सर्वपक्षीय बैठकले खाद्यान्न, डेरी, तरकारी लगायत अत्यावश्यक सामग्री पाइने पसल विहान ११ बजेदेखि दिउँसो ३ बजेसम्म खोल्न दिने निर्णय गरेको हो ।

अन्य समयमा भने हिंड्डुल गर्न नपाइने गरी निषेधित क्षेत्र कायमै रहने प्रमुख जिल्ला अधिकारी कुमार बहादुर खड्काले जानकारी दिए ।

लकडाउनका बेला जिल्ला प्रशासन कार्यालयले जारी गरेको पास बाहेकका सवारी साधन सञ्चालन गर्न नपाइने खड्काले बताए ।

यसअघि पाँच दिनको अन्तरालमा २३ जना संक्रमित भेटिएपछि नेपालगञ्जलाई बैशाख २३ गते विहान ११ बजेदेखि बैशाख २५ गते मध्यरातिसम्म निषेधित क्षेत्र घोषणा गरिएको थियो ।