काठमाडौं- प्रधानमन्त्री केपी शर्मा ओलीले विश्व शान्तिको चाहनामा तड्पिरहेको बताएका छन् । बुद्धजयन्तीको अवसरमा एक भिडियो सन्देश जारी गर्दै प्रधानमन्त्री ओलीले विश्व शान्तिका लागि बुद्धका सन्देश अझ बढी सान्दर्भिक भएको बताएका छन् ।

सन्देशमा प्रधानमन्त्रीले भनेका छन्, ‘हाम्रो देशमा केही दिन अघि मात्रै फेरि पनि चार जना निर्दोष बालबालिकाहरु बम विस्फोटको अचानक शिकार भएर आफ्नो ज्यान गुमाउन बाध्य भए । म उनीहरुप्रति अत्यन्तै संवेदनशील भावका साथ श्रद्धासुमन अर्पण गर्न चाहन्छु ।’

प्रधानमन्त्री ओलीले कोरोना भाइरसले दुनियाँलाई एउटा नयाँ भयावह त्रासदीको स्थितिमा पुर्‍याएको भन्दै सचेत रहन आग्रह गरेका छन् । ‘संक्रमितहरुको संख्या बढ्दो छ र त्यसबाट ज्यान गुमाउनेहरुको संख्या पनि बढ्दो छ । यस दुःखद घडीमा म कोरोना भाइरसबाट आफ्नो अमूल्य जीवन गुमाउने सबैप्रति श्रद्धासुमन अर्पण गर्न चाहन्छु । र, संक्रमितहरुको शीघ्र स्वास्थ्य लाभको कामना गर्न चाहन्छु’ जारी भिडियो सन्देशमा भनिएको छ ।

सरकारले सुरुदेखि नै चालेका प्रभावकारी कदमहरुका कारण अहिलेसम्म नेपालमा स्थिति भयावह नभएको भन्दै प्रधानमन्त्रीले भयावह हुनसक्ने लक्षण भएकाले थप सजग हुन आग्रह गरेका छन् ।

सन्देशमा प्रधानमन्त्रीले भनेका छन्, ‘गौतम बुद्धको स्मृति र सम्मानमा गौतम बुद्धका शान्तिका सन्देशहरु हामी सबै मिलेर सम्प्रेषण गरौं भन्ने आग्रहका साथ दिंवगतहरुप्रति श्रद्धासुमन अर्पण गर्न, घाइतेहरुको शीघ्र स्वास्थ्य लाभको कामना गर्न, उपचारमा संलग्न स्वास्थयकर्मीहरु, स्वयंसेवीहरु र यस कार्यमा सहयोगी हातहरु बढाउने सबैप्रति ऐक्यबद्धता जनाउन आजको दिन आआफ्ना संस्थाहरु र आआफ्ना घरहरु, निवासहरुमा दीप प्रज्वलन गर्न र शान्तिको कामना गर्न ७ बजे दीप प्रज्वलनका लागि म सबै दिदीबहिनी तथा दाजुभाइहरुमा हार्दिक आग्रह र अनुरोध गर्दछु ।’

भिडियो हेर्नुहोस्