काठमाडौं- कोरोना भाइरसको सन्त्रास बढेकाले वाग्मती सफाइ महाअभियानमा भीड जम्मा नगरी साङ्केतिक रुपमा मात्र सफाइ गरिने भएको छ ।

वाग्मती सफाइ महाअभियानको ३५६औँ हप्तामा तीनवटै सुरक्षा निकायलाई सहभागी नगराइने भएको छ । कोरोना भाइरसको सन्त्रासका कारण नियमित केही अभियानकर्मी जम्मा भएर जनचेतनामूलक कार्यक्रम मात्र गरिने अधिकार सम्पन्न वाग्मती सभ्यता एकीकृत विकास समिति सञ्चालक सदस्य माला खरेलले  जानकारी दिए ।

अभियानकर्मी पनि नदीभित्र नछिर्ने कार्यक्रम छ । समयमै सजगता अपनाउन गुह्येश्वरीमाथिको वाग्मती सफाइ अभियान साङ्केतिक रुपमा मात्र गर्न लागिएको वाग्मती सुन्दरता सरोकार मञ्चका अध्यक्ष उत्तम पुडासैनीले जानकारी दिए ।

माथिल्लो क्षेत्रको वाग्मती सफाइ अभियानको दुई हजार २१३ दिनमा धेरै काम भएकाले सन्त्रास रहेसम्मका लागि मानिस जम्मा नगर्ने गरी कार्यक्रम तय गरिएको हो ।

सफाइलाई नित्यकर्मका रुपमा अघि बढाउँदा समयसापेक्ष रुपमा नमूना परिवर्तन गर्दै आएको छ । फोहरबाट ७० प्रतिशत रोग उत्पन्न हुनसक्ने टोलटोलमा जानकारी गराई रोगको मुहान अन्त्य गर्न लागिएको हो ।

पछिल्लो समय विद्यालयका विद्यार्थीलाई समेत नदी सफाइमा परिचालन गरिएको थियो । कोरोनाको सन्त्रास रहेसम्म विद्यालयका विद्यार्थीलाई सफाइमा सरिक नगराइने भएको छ । बिहानको चिसोमा भाइरस ज्यादा सक्रिय हुने र फोहरमैलामा धेरै सक्रिय रहने भन्ने तथ्यहरु सार्वजनिक भइरहेकाले पनि सफाइमा भीड कम गर्न लागिएको हो ।

आज बिहान माथिल्लो क्षेत्रमा ३१७ औँ हप्ताको वाग्मती सफाइ गोठाटारस्थित गाई–बाच्छा संरक्षण स्थलमुनिको नदी किनारमा केही अभियानकर्मी जम्मा भएर साङ्केतिक रुपमा गर्न लागिएको हो । यसैगरी उपत्यकामा सञ्चालित अन्य सफाइ अभियानमा पनि मानिसको भीडभाड कम गरी निरन्तरता मात्र दिइने जनाइएको छ ।