राजविराज– सप्तरीमा मंगलबार मृत्यु भएका तीन जनामध्ये एक जनामा कोरोना संक्रमण पुष्टि भएको छ । दुई जनाको रिपोर्ट नेगेटिभ आएको छ ।

रूपनी गाउँपालिका ४५ वर्षीय पुरुष, राजगढ गाउँपालिकाका ७१ वर्षीय पुरुष र मा डाक्नेश्वरी नगरपालिका ९ का ७४ वर्षीय पुरुषको मंगलबार मृत्यु भएको थियो । तीनै जनाको मृत्यु कोरोना संक्रमणसँग मिल्दो लक्षण देखिएको आधारमा स्वाब परीक्षण गरिएको थियो ।

रूपनीका पुरुषको रिपोर्ट पोजेटिभ र अन्य दुई जनाको रिपोर्ट नेगेटिभ आएको जिल्ला स्वास्थ्य कार्यालय सप्तरीले जनाएको छ ।

रूपनीका ती पुरुष डेढ महिना अघि मलेसियबाट फर्किएका थिए । पछिल्लो समय ज्वरो आएपछि र स्वासप्रस्वासमा समस्या भएपछि उनी राजविराजस्थित गजेन्द्रनारायण सिंह अस्पताल भर्ना गरिएका थिए ।

त्यहाँ उपचार सम्भव नभएपछि धरानस्थित विपी कोइराला स्वास्थ्य विज्ञान प्रतिष्ठान पु¥याएपछि उनको मृत्यु भएको थियो । गाउँमा शवको अन्तिम संस्कारको तयारी भइरहेका बेला गाउँपालिकाले नै हस्तक्षेप गरी स्वाब परिक्षण गराएको थियो ।

स्वास्थ्य कार्यालयले उनका परिवारजनाको पनि स्वाब परीक्षणको गराउने भएको छ । ती मृतकको सम्पर्कमा आएका सबैलाई होम क्वारेन्टाइनमा राखेको जिल्ला स्वास्थ्य कार्यालयका निमित्त प्रमुख दुनियाँलाल यादवले जानकारी दिए ।

यसैगरी, राजविराजस्थित छिन्नमस्ता अस्पतालमा उपचारकै क्रममा मृत्यु भएका राजगढ गाउँपालिकाका ७१ वर्षीय पुरुष र डाक्नेश्वरी नगरपालिका ९ का ७४ वर्षीय पुरुषको रिपोर्ट नेगेटिभ आएको यादवले बताए ।

यो सँगै सप्तरीमा कोरोनाका कारण मृत्यु हुनेको संख्या दुई पुगेको छ भने कोरोना संक्रमितको संख्या ५४० पुगेको छ । यसअघि गत साउन १ गते राजविराज ६ का ७३ वर्षिय एक पुरुषको कोरोना संक्रमणका कारण मृत्यु भएको थियो । मृत्युको करिब दुई साताअघि उनी भारतको दरभङ्गाबट फर्किएका थिए ।