काठमाडौं- प्रमुख प्रतिपक्ष दल नेपाली कांग्रेसले जनताप्रतिको जिम्मेवारी पूरा गर्न राष्ट्रिय अठोटको आवश्यकता रहेको औंल्याएको छ ।

प्रतिनिधिसभाको शनिबार बसेको बैठकमा विनियोजन विधेयकमाथिको छलफलमा भाग लिँदै कांग्रेस सांसद डा. मीनेन्द्र रिजालले जनताप्रतिको जिम्मेवारी पूरा गर्न सम्पूर्ण राजनीतिक दल एक ठाउँमा उभिएर राष्ट्रिय अठोट गर्नुपर्ने आवश्यकता रहेको बताए ।

उनले कोरोना महामारीको असर कम गर्न सरकारले ध्यान दिन नसकेको आरोप लगाउँदै अहिलेको संकटपूर्ण अवस्थामा सबै दल एक ठाउँमा उभिएर राष्ट्रिय अठोटका साथ अघि बढ्नुको विकल्प भएको धारणा राखे ।

सांसद डा. रिजालले जनता कसरी कोरोनाबाट बच्ने भन्ने चिन्तामा रहेको तर सरकार भने कार्पेट परिवर्तन गर्नतिर लागेको आरोप समेत लगाए ।