काठमाडौं- कोरोना परीक्षणको दायरा बढाउन र छिटो नतिजाका लागि स्वास्थ्य तथा जनसंख्या मन्त्रालयले ‘अटोमेटेड मेसिन’ जडान गर्ने  भएको छ ।

मन्त्रालयका प्रवक्ता डा. विकास देवकोटाले परीक्षणको दायरा बढाउन अटोमेटेड मेसिन जडान गर्न लागिएको जानकारी दिएका हुन् । उनले पीसीआर मेसिन थप्ने प्रक्रिया पनि थालेको जानकारी दिए ।

उनले सातवटै प्रदेशमा नमूना परीक्षण गर्ने अटोमेटेड मेसिन राख्न आवश्यक तयारी थालिएको जानकारी दिएका हुन् ।

“मेसिनको खरिद प्रक्रिया अगाडि बढाइसकेका छौं। यो जडान भएपछि यसले नमूना परीक्षणमा भइरहेको ढिलाइ कम हुनेछ”, उनले भने, “परीक्षणको नतिजा ढिलो हुने र दायरा नबढेकाले थप व्यवस्थापन गर्न लागिएको हो।”

उनले २१ स्थानबाट हाल पीसीआर विधिबाट परीक्षणको काम भइरहे पनि केही ठाउँमा क्षमता अनुसार परीक्षण हुन नसकेको बताए।

अहिले काम गरिरहेकै पीसीआर मेसिनहरूमा अटोमेटेड मेसिन जडान गरिनेछन्। अटोमेटेड मेसिनले एक पटकमा कम्तिमा एक हजार नमूना थप परीक्षण गर्न सक्ने प्रवक्ता देवकोटाले बताए।