काठमाडौं – भुटानी शरणार्थीको कथामा बन्ने एक अङ्ग्रेजी भाषाको फिल्ममा नायिका स्वस्तिमा खड्काले अभिनय गर्ने भएकी छिन् ।

अमेरिकाका केही स्वतन्त्र फिल्ममेकरले निर्माण गर्न लागेको यो फिल्ममा स्वस्तिमाले शीर्ष भूमिकामा अभिनय गर्ने भएकी छिन् ।

यद्यपि लकडाउनका कारण फिल्मको काम अहिले नै अगाडि नबढ्ने देखिएको छ । स्वस्तिमाले भुटानी युवतीको भूमिकामा अभिनय गर्ने र मेकर पनि सकारात्मक देखिएको बताइन् ।

‘यो अङ्ग्रेजी भाषाको फिल्म भए पनि हलिउड फिल्म होइन, मैले पनि अभिनय गर्ने कुरा भएको हो,’ स्वस्तिमाले खबरहबसँग भनिन्, ‘अहिले भने लकडाउनका कारण फिल्मको काम अगाडि बढ्नेबारे टुङ्ग छैन, कोरोनाको प्रभाव पर्‍यो ।’

फिल्ममा अर्की नायिका केकी अधिकारीले पनि अभिनय गर्ने चर्चा छ । केकी र स्वस्तिमा दिदीबहिनीका रुपमा देखिने बताइएको छ ।

यद्यपि कोरोना भाइरसले संयुक्त राज्य अमेरिकामा झन् बढी प्रभाव पारेकाले फिल्म शूटिङ कहिले हुने भन्ने टुंगो छैन । फिल्ममा केही कलाकार अमेरिकाका रहने जनाइएको छ ।