काठमाडौं- प्रधानमन्त्री केपी शर्मा ओलीले संयुक्त अरब इमिरेटस् (यूएई)का युवराज शेख मोहम्मद बिन जायद अल नाह्यानसँग फोन वार्ता गरी त्यहाँ रहेका नेपालीहरुकाे अवस्थाबारे जानकारी लिएका छन् ।

विश्वव्यापी महामारीका रूपमा फैलिरहेको कोभिड-१९ का कारण विदेशमा रहेका नेपालीको अवस्थाबारे बुझ्ने क्रममा प्रधानमन्त्री ओलीले सोमबार साँझ यूएईका युवराज नाह्यानसँग फोन वर्ता गरेका हुन्।

फोन वार्तामा युवराज नाह्यानले नेपालीहरूलाई यूएईका नागरिकसरह नै व्यवहार र सहयोग गर्ने बताएको प्रधानमन्त्री ओलीले सामाजिक सञ्जाल ट्वीटरमार्फत् जानकारी दिएका छन्।

‘त्यहाँ रहेका नेपालीहरूको सुरक्षाको सन्दर्भमा मैले राखेको जिज्ञासामा उहाँले भन्नुभयो– नेपालीहरू इमान्दार र परिश्रमी छन्। उनीहरूले यूएईको आर्थिक विकासमा पुर्‍याएको योगदानको प्रशंसा गर्दछु’, प्रधानमन्त्रीले लेखेका छन्।

यूएई नेपालीहरूको वैदेशिक श्रम गन्तव्यको प्रमुख एक देश हो।