काठमाडौं– बालुवाटारको ललिता निवास जग्गा प्रकरणमा कांग्रेस नेता विजयकुमार गच्छदारसहित १७५ जनाविरुद्ध अख्तियार दुरुपयोग अनुसन्धान आयोगले मुद्धा दायर गरेपछि आज कांग्रेसले आफ्नो धारणा सार्वजनिक गर्ने भएको छ ।

सत्ता र शक्तिको आडमा सरकारले जथाभावी बल प्रयोग गरेको भन्दै कांग्रेसले आफ्ना नेता गच्छदारविरुद्धको मुद्धाका विषयमा आफ्नो धारणा सार्वजनिक गर्न लागेको हो ।

कांगेस केन्द्रीय कार्यालय सानेपामा अपरान्ह ४ बजे पत्रकार सम्मेलन गर्दै कांग्रेसले आफ्नो धारणा सार्वजनिक गर्न लागेको कांग्रेस नेता ज्ञानेन्द्रबहादुर कार्कीले खबरहबलाई जानकारी दिए ।

‘ उपसभापति गच्छादारमाथिको मुद्दा प्रतिशोध पूर्ण र कांग्रेसमाथिको सुनियोजित आक्रमण भएको निष्कर्ष बैठकले निकालेको छ’ नेता कार्कीले भने,‘राजनीतिक प्रतिशोध भएका कारण देशव्यापी रुपमा युवा विद्यार्थीलाई यसविरुद्ध डटेर लाग्न आह्वान गर्ने निर्णय भएको छ ।’

आज बिहान कांग्रेस सभापति शेरबहादुर देउवाको निवासमा बसेको बैठकले सरकारले बदनियतपूर्ण र प्रतिशोध लिने सोचका साथ यो अभियान चालेको निष्कर्ष निकाल्दै सशक्त प्रतिकार गर्ने कांग्रेसले जनाएको छ ।

सरकारको रवैयाविरुद्ध सशक्त प्रतिकार गर्ने दाबी गर्दै आएको कांग्रेसले आफ्ना भ्रातृ संगठनलाई परिचालन गरी विरोध गर्ने निर्णय गरेको छ । त्यसका लागि आजै दिउँसो ३ बजे युवा विद्यार्थीसहित भ्रातृ संगठनको बैठक बसेर आवश्यक निर्णय लिइने कांग्रेसले जनाएको छ ।

युवा विद्यार्थीसहित भ्रातृ संगठनको बैठकको बैठकपछि पार्टीले पत्रकारसम्मेलनमार्फत आफ्नो धारणा र आगामी कार्यक्रम सार्वजनिक गर्ने योजना बनाएको छ ।