काठमाडौँ- नेपाल राष्ट्र बैंकले ५० रुपैयाँ दरका नयाँ नोट सोमबारबाट बजारमा ल्याउने भएको छ ।

ती नोटमा निवर्तमान गभर्नर डा. चिरञ्जिबी नेपालको हस्ताक्षर रहने जनाइएको छ ।

राष्ट्र बैंकले सूचना सार्वजनिक जारी गर्दै ५० दरका नयाँ नोट बजारमा पठाउने जनाएको हो । नयाँ गभर्नर महाप्रसाद अधिकारीले हस्ताक्षर रहेका नयाँ नोटहरु भने आगामी कात्तिकबाट बजारमा ल्याउने राष्ट्र बैंकले जनाएको छ ।

सो नोटको अघिल्लो भागमा सगरमाथाको चित्र र लालीगुँरासको पानी छाप रहेको छ । त्यस्तै, नोटको तल्लो भागको बोर्डरमा नेपालीमा वि.सं २०७५ लेखिएको छ । अर्को भागमा हिउँ चितुवाको चित्र रहेको छ ।

नोटको मध्य भागमा नेपाल राष्ट्र बैंक लेखिएको हुने राष्ट्र बैंकले जनाएको छ ।