काठमाडौं- सरकारले विदेशमा अलपत्र नेपालीको उद्धारको काम सुरू गरेको छ। आज म्यानमारबाट २६ नेपालीलाई सरकारले ल्याइसकेको छ भने अन्य मूलुकबाट पनि ल्याउने तयारी सुरू भएको छ ।

यसबीचमा अब यूएईमा अलपत्र परेका १५७ जना नेपाली नेपाल आउने अन्तिम तयारीमा पुगेका छन् । उनीहरुले बोर्डिङ लिएर उडानका लागि युएईको शारजहा अन्तर्राष्ट्रिय विमानस्थलमा उड्ने समय पर्खिएर बसेका छन् ।

नागरिक उड्ययन प्राधिकरणका प्रवक्ता राजकुमार क्षेत्रीका अनुसार युएईबाट साढे ३ भित्रमा विमान नेपाल आइपुग्ने छ । तर तर विमानस्थलका महाप्रवन्धक देवेन्द्र केसीले भने युएईको विमान आजै आउने भनिए पनि कतिबजे भन्ने एकिन भइनसकेको जानकारी दिए ।

यूएईबाट नेपाली लिएर आउने विमान बिहान साढे ११ बजे आउने भनिएको भएपनि यूएईका अधिकारीहरूले उडानसँग सम्बन्धित केही विषय अझै प्रस्ट हुन बाँकी रहेको बताएपछि उडान अन्यौलमा परेको थियो ।

यसबारे दूतावासले थप सहजिकरण गरी अलपत्र नेपालीलाई ल्याउने अन्तिम तयारी गरेको हो ।

एयर अरेबियाको जहाजले ट्रान्सगार्ड सेक्युरेटिका ७९ र इजाजा कम्पनीका ६७ जना र अन्य ११ जना नेपाली नागरिक लिएर आउनेछ ।

स्रोतका अनुसार उनीहरु कम्पनी र आफ्नै खर्चमा नेपाल फर्किन लागेका हुन् ।