काठमाडौं– परपुरुषसँग सल्किएको निहुँमा बुहारीको हत्या गरेको अभियोगमा पर्सा प्रहरीले सासु–ससुरासहित ५ जनालाई नियन्त्रणमा लिएको छ ।

पर्साको बहादुरमाई नगरपालिका–८ घर भएकी २५ वर्षीया उर्मीला देवी पण्डितको हत्या गरेको अभियोगमा उनका ५१ वर्षीय ससुरा सुरेश पण्डित, सासु ५१ वर्षर्क फूलकुमारी देवी र उनकी देउरानी २२ वर्षीय माल्दा देवीलाई प्रहरीले पक्राउ गरेको हो । प्रहरीले अन्यन २ जनालाई पनि पक्राउ गरिएको जनाए पनि उनीहरुको नाम भने खुलाइएको छैन ।

प्रहरीका अनुसार ससुरा सुरेशसहित सासु फूलकुमारी समेतले उर्मीलाको हत्या गरी शनिबार राति ११ बजेतिर जलाउन लागेका थिए ।

स्थानीयको सूचनाका आधारमा घटनास्थलमा पुगेको प्रहरीले उर्मीलाको शव जलाउँदै गरेको अवस्थामा समेत बरामद गरेको छ ।

प्रारम्भिक अनुसन्धानका क्रममा ससुरा सुरेशसहितले परपुरुषसँग अनैतिक सम्बन्ध राखेको भन्दै उर्मीलाको हत्या गरेको देखिएको छ ।

प्रहरीले घटनाको सम्बन्धमा थप अनुसन्धान भइरहेको जनाएको छ ।