फ्रान्स– फ्रान्सको राजधानी पेरिसमा रहेको रोँजिस इन्टरनेशनल संसारको सबैभन्दा ठूलो थोक बजार हो ।

कोरोना भाइरसको महामारीका कारण ठूलो संख्यामा मानिसहरुको मृत्यु भएपछि शवको व्यवस्थापनका लागि अहिले यो बजारलाई अस्थायी शवगृह बनाइएको छ ।

फ्रान्समा हालसम्मा कोरोना भाइरसका कारण ७ हजार ५ सय भन्दा धेरैको मृत्यु भइसकेको छ ।

तर, अस्थायी शवगृह बनाइएपनि उक्त बजार भने बन्द गरिएको छैन । बजारमा मानिसहरुको चहलपहल र सामानको कारोबार पनि नियमित भइरहेको छ ।

पेरिसको दक्षिणी क्षेत्रमा रहेको उक्त बजारमा १ हजारभन्दा धेरै कफिन अट्नेगरी शवगृह बनाइएको अन्तर्राष्ट्रिय सञ्चारमाध्यमले जनाएका छन् ।

शव नबिग्रियोस् भन्नाका लागि शवगृहमा चिस्यानको समेत बन्दोबस्त गरिएको छ ।

कोरोना भाइरसका कारण मृत्यु भएका मानिसहरुको शव राख्नका लागि पर्याप्त स्थान नभएका कारण बजारलाई नै अस्थायी शवगृह बनाउनुपरेको प्रहरीले जनाएको छ ।

शुक्रबारबाट शवहरु आउन शुरु भएको र सोमबारबाट आफन्तहरुलाई उच्च सतकर्तासाथ शव हेर्न दिइने जनाइएको छ ।

थोक बजारको एउटा कुनामा बनाइएका कारण शवगृहले बजारमा हुने कारोबारमा कुनै असर नपर्ने जनाइएको छ ।

५७५ एकड क्षेत्रफलमा फैलिएको उक्त बजारमा १५ हजारभन्दा धेरैले काम गर्दै आएका छन् ।