एजेन्सी- इटालियन क्लब एसी मिलान युरोपा लिग फुटबलको नकआउट चरण प्रवेश गरेको छ ।

बिहिबार राति भएको समूह चरणको खेलमा सेल्टिकलाई ४-२ गोल अन्तरले पराजित गर्दै मिलानले अन्तिम ३२ को यात्रा निश्चित गरेको हो ।

घरेलु मैदानमा दुई गोलले पछि परेको स्थिति उल्टाएर मिलानले जित निकालेको हो । खेलको सातौँ मिनेटमा टम रोजिगले गोल गर्दै सेल्टिकलाई अग्रता दिलाएका थिए ।

१४औँ मिनेटमा ओडसोनी एडोवार्डले गोल गर्दै सेल्टिकलाई २-० को अग्रता दिलाए । तर, २४औँ मिनेटमा हाकनले गोल गर्दै मिलानलाई २-१ को स्थितिमा ल्याए ।

२६औँ मिनेटमा मिलानका सामुएल कास्टिललेजोले गोल गरेपछि पहिलो हाफ २-२ गोलको बराबरीमा सकियो ।

खेलको ५०औँ मिनेटमा जेन्स पिटरले गोल गर्दै मिलानलाई ३-२ को अग्रता दिलाए । ८२औँ मिनेटमा ब्राहिम डियाजले गोल गर्दै मिलानलाई ४-२ को जित दिलाए ।

जितसँगै समूह एचमा रहेको मिलानले ५ खेलमा १० अंक जोडेको छ । मिलान दोस्रो स्थानमा रहेको छ ।