काठमाडौँ – अर्थ र सञ्चार तथा सूचना मन्त्री डा. युवराज खतिवडाले पदबाट राजीनामा गर्ने भएका छन् । आज बसेको मन्त्रिपरिषद बैठकमा उनले राजीनामा बारे जानकारी गराएका हुन् ।

गैरसांसदका रूपमा मन्त्री नियुक्त भएका डा. खतिवडा संघीय सांसद नहुने पक्का भएपछि उनले शुक्रबार नै राजीनामा दिने भएका छन् । उनको कार्यकाल भोलि सकिँदै छ ।

बैठकमा उनले आफ्नो कार्यकालका आर्थिक उपलव्धिबारे पनि संक्षिप्त जानकारी गराएका थिए ।

सरकारको सिफारिसमा राष्ट्रियसभामा मनोनीत गर्ने रिक्त एक स्थानमा पार्टी उपाध्यक्ष वामदेव गौतम र मन्त्री खतिवडामध्ये कसलाई पठाउने भन्ने रस्साकस्सीमा गौतमको पल्ला भारी भएपछि डा. खतिवडा बाहिरिएका हुन् । बिहीबार भएको नेकपा सचिवालय बैठकले गौतमको नाम सिफारिस गर्ने निर्णय गरेको थियो ।

शुक्रबार बसेको मन्त्रिपरिषद बैठकले गौतमलाई मनोनीत गर्ने प्रधानमन्त्री केपी शर्मा ओलीको प्रस्ताव अनुमोदन गरेको छ ।

राष्ट्रियसभामा नेपाल सरकारको सिफारिसमा कम्तीमा एक महिलासहित तीन जना सदस्य राष्ट्रपतिबाट मनोनीत हुने व्यवस्था छ । मनोनीत सदस्यका रूपमा डा. युवराज खतिवडाको दुई वर्षे कार्यकाल सकिएपछि गत फागुनदेखि एक स्थान रिक्त थियो ।

राष्ट्रियसभा सदस्यको कार्यकाल ६ वर्ष हुन्छ । पहिलोपटक एक तिहाइको २ वर्ष, अर्को एक तिहाइको ४ वर्ष र बाँकी एक तिहाइको ६ वर्ष हुने गरी गोला प्रथाबाट सदस्यहरुको कार्यकाल निर्धारण गर्ने संवैधानिक प्रावधानअनुसार डा. खतिवडा २ वर्षको कार्यकालमा परेका थिए ।

अर्थमन्त्री रहेका डा. खतिवडा २ वर्षपछि गैरसांसदका रूपमा अर्थमन्त्री नियुक्त भएका थिए ।

नेकपाको एउटा खेमा अर्थमन्त्रीका रूपमा डा. खतिवडासँग असन्तुष्ट थियो । उनले लिएको आर्थिक नीतिले नेकपाको घोषणाको भावना बेवास्ता गरेको विरोधी खेमाको आरोप थियो ।