पोखरा– गण्डकी प्रदेशमा शुक्रबार बिहान थप ४० जनामा कोरोना भाइरस संक्रमण पुष्टि भएको छ ।

स्वास्थ्य निर्देशनालय गण्डकीले शुक्रबार बिहान दिएको जानकारीअनुसार गण्डकी प्रदेशमा थप ४० जनामा संक्रमण पुष्टी भएको हो । बढी संक्रमित हुनेमा कास्कीको पोखरा महानगरपालिका र नवलपरासीपूर्वका छन् ।

पोखरामा ७ प्रहरीमा कोरोना

पोखरा लेखनाथ नगरपालिकाका थप १६ जनामा संक्रमण देखिएको छ । ती मध्ये ७ जना नेपाल प्रहरीमा कार्यरत हुन् । पोखरा १५ मा कार्यरत नेपाल प्रहरीका ७ जना प्रहरीमा संक्रमण देखिएको स्वास्थ्य निर्देशनालय पोखराले जनाएको छ ।

निर्देशनालयकाअनुसार पोखराका विभिन्न वडाका संक्रमित ७ पुरुष कन्ट्याक्ट ट्रेसिङका आधारमा पहिचान भएका हुन् भने दुई महिला स्वास्थ्य विज्ञान प्रतिष्ठानको पे’ क्लिनिकमा कोरोना परीक्षण गर्न आएका हुन् ।

पूर्वी नवलपरासीमा १७ संक्रमित

पूर्वी नवलपरासीमा शुक्रबार १७ जना कोराना संक्रमित थपिएका छन् । ती मध्ये १६ जना गैंडाकोट नगरपालिकाका छन् । संक्रमण पुष्टी हुनेमा ५ महिला छन् भने १२ जना पुरुष छन् । एक जना संक्रमित भने देवचुली नगरपालिका ७ का ३५ वर्षीय पुरुष छन् ।

यसैगरी लम्जुङका ३ जना, तनहुँका २ जना तथा स्याङजा, बाग्लुङका एक एक जनामा पनि शुक्रबार कोरोना संक्रमण पुष्टी भएको स्वास्थ्य निर्देशनालय पोखराका निर्देशक डा. बिनोद बिन्दु शर्माले जानकारी दिए ।

योसँगै गण्डकी प्रदेशमा कोरोना संक्रमितको संख्या २ हजार ३ सय ५२ पुगेको छ । ती मध्ये १ हजार ७ सय ६६ जनाले कोरोना जितेका छन् । गण्डकी प्रदेशमा ५ सय ६८ जना संक्रिय संक्रमित रहेका छन् । गण्डकी प्रदेशमा अहिलेसम्म १८ जनाको कोरोना संक्रमणका कारण मृत्यु भएको स्वास्थ्य निर्देशनालय पोखराले जनाएको छ ।