नवलपुर । नवलपरासी (बर्दघाट–सुस्तापूर्व) जिल्लामा पहिलो पटक प्रमुख जिल्ला अधिकारीको जिम्मेवारी महिलाले सम्हाल्ने भएकी छन् ।

नवलपरासीपूर्वका प्रमुख जिल्ला अधिकारी पिताम्बर घिमिरेलाई रुपन्देही जिल्लाको प्रमुख जिल्ला अधिकारीमा पदस्थापन गरिएपछि गृह मन्त्रालयकी सहसचिव मनमायाँ पंगेनी भट्टराईलाई नवलपरासीपूर्वमा प्रजिअको जिम्मेवारी दिइएको हो ।

महिला बालबालिका तथा जेष्ठ नागरिक मन्त्रालयबाट केही दिनअघि मात्रै पंगेनी गृह मन्त्रालयमा सरुवा भएर आएकी थिइन् । गृह मन्त्रालयकी सहसचिव पंगेनीलाई पहिलो पटक नवलपुरको महिला प्रजिअको रुपमा पठाइएको हो ।

रुपन्देहीका प्रमुख जिल्ला अधिकारी महादेव पन्थलाई प्रदेश ५ कै सामाजिक विकास मन्त्रालयमा सरुवा गरिएपछि रुपन्देही जिल्ला रिक्त थियो । सो ठाउँमा नवलपरासीपूर्वका प्रजिअ घिमिरेलाई पठाएसँगै पंगेनीलाई नवलपरासीपूर्वमा पदस्थापन गरिएको हो ।

नवलपुरकै चेली

राज्यको पुर्नसंरचनाका क्रममा नवलपरासी जिल्ला टुक्रिएपछि बनेको नवलपरासीपूर्व सबैभन्दा कान्छो जिल्ला हो । नवपरासीपूर्वमात्र नभई जिल्ला टुक्रिनु भन्दा अघिको नवलपरासी जिल्लामा नै यसअघि महिला प्रजिअको रुपमा कोही पनि आएका छैनन् ।

नवलपरासीपूर्वमा पहिलो पटक प्रजिअको भएर आएकी उनी यहाँकी चेली हुन् । नवलपरासीपूर्व मध्यबिन्दु नगरपालिका ११ अरुणखोलामा जन्मिएर सोही ठाउँबाट नै माध्यामिक तहको शिक्षा हासिल गरेकी पंगेनीलाई प्रजिअको रुपमा पाउँदा जिल्लाबासी हर्षित भएका छन् ।

जिल्लामा पहिलो पटक यहिँ जम्मिएर हुर्किएको आफ्नै चेलीलाई प्रमुख जिल्ला अधिकारीका रुपमा पाउँदा निकै खुशी लागेको स्थानीयले बताएका छन् ।