मुम्बई – भारतकी लोकप्रिय कोरियोग्राफर सरोज खानको निधन भएको छ । ७१ वर्षीया खानको शुक्रवार हृदयाघातका कारण निधन भएको हो ।

केही दिनदेखि सास फेर्न गाह्रो हुने समस्या देखिएपछि उनलाई मुम्बईको बान्द्रास्थित गुरु नानक अस्पतालमा उपचार गरिएको थियो । उपचारका क्रममा उनको निधन भएको भारतीय मिडियाले उल्लेख गरेका छन् ।

सरोजले करीब २ हजार फिल्ममा कोरियोग्राफी गरेकी छिन् । बलिउडका अधिकांश अभिनेत्रीलाई उनले नृत्य सिकाएकी थिइन् । उनले श्रीदेवी र माधुरी दीक्षितलाई पनि नृत्य सिकाएकी थिइन् ।

४० वर्षको आफ्नो करिअरमा सरोजले अवार्डसमेत जितेकी छिन् । उनले ३ राष्ट्रिय अवार्ड पनि जितेकी थिइन् ।

सरोजले पहिलोपटक सन् १९७४ मा ‘गीता मेरा नाम’ बाट आफ्नो करिअर थालेकी थिइन् । सरोजले पछिल्लो समय ‘कणिकर्णिका’ र ‘कलंक’ मा कोरियोग्राफी गरेकी थिइन् ।

उनका पतिसहित एक छोरा र दुई छोरी छन् । बलिउडकर्मीले सरोजको निधनको खबरपछि श्रद्धाञ्जली अर्पण गरेका छन् ।