काठमाडौं- जिल्ला प्रशासन कार्यालय बाँकेले लकडाउन केही खुकुलो बनाउँदै व्यवसाय सञ्चालन गर्न दिने निर्णय गरेको छ ।

सर्वदलीय, सर्वपक्षीय बैठकको सुझावका आधारमा जिल्ला प्रशासन कार्यालयले बारअनुसार व्यवसाय सञ्चालन गर्न दिने निर्णय गरेको हो ।

प्रशासनले जारी गरेको सुचना अनुसार अब हरेक आइतबार र बुधबार मोबाईल, ईलेक्ट्रोनिक्स, स्टेशनरी/पुस्तक पसल, फोटो स्टुडियो, छापाखाना, फर्निचर, फर्निसिङ तथा भाडा पसल खोल्न पाइने छ ।

त्यसैगरी सोमबार र बिहिबार कपडा, फेन्सी, जुत्ता, कस्मेटिक, चस्मा तथा गरगहनाका पसल सञ्चालन गर्न दिइने छ । मंगलबार र शुक्रबार अटो मोबाईल्स, कोल्ड स्टोर, जुत्ता, मोटरसाईकल तथा अन्य पसलहरु सञ्चालन गर्न दिइने जिल्ला प्रशासनद्वारा जारी सूचनामा जनाइएको छ ।

व्यवसाय सञ्चालनका लागि  बिहान ११ बजेदेखी ३ बजेको समयावधिमा तोकिएको छ । औषधि पसल, दैनिक उपभोग्य सामग्री, निर्माण सामग्री, मलखाद तथा विउविजन बिक्रि गर्ने पसल भने हरेक दिन खोल्न पाइने भएको छ ।

बैंकहरु भने सार्वजनिक बिदाको दिन बाहेक हरेक दिन खुल्ला रहने जिल्ला प्रशासन कार्यालय बाँकेद्धारा जारी सूचनामा उल्लेख छ ।