भारत- भारतीय प्रधानमन्त्री नरेन्द्र मोदीले कोरोना भाइरसका कारण २१ दिने लकडाउनमा रहेका भारतीयहरुलाई आगामी आइतबारका दिन राति नौ बजे दीप प्रज्वलन गर्न अपिल गरेका छन् ।

देशबासीका नाममा शुक्रबार सम्बोधन गर्दै प्रधानमन्त्री मोदीले आइतबार राति नौ बजे नौ मिनेटसम्म दीप प्रज्वलन गर्न आग्रह गरेका हुन् ।

उनले सबै भारतीयहरुसमक्ष आइतबारका दिन बिजुली बत्ती बन्द गरी घरको ढोका, कौसी वा बार्दलीमा निस्केर दीयो, मैनबत्ती, मोबाइल फ्ल्यास लाइट वा टर्च बाल्न आग्रह गरे ।

उनले ज्योतिषीहरुसँग परामर्श गरी आइतबार राति नौ बजे नौ मिनेटको समय निकालेको जनाइएको छन् ।

प्रधानमन्त्री मोदीका अनुसार निराशाबीच आशाको ज्योतितर्फ डोर्‍याउनका लागि मानिसहरुलाई दीप प्रज्वलन गर्न अपिल गरिएको हो ।

यसअघि मोदीले गत २२ मार्चका दिन भारतीयहरुलाई जनता कफ्र्यूको पालना गरी सबैले थपडी, शंख, भाँडाकुडा बजाएर कोरोना भाइरसविरुद्ध खटिरहेका चिकित्सकहरुलाई हौसला प्रदान गर्न आह्वान गरेका थिए ।