नयाँ दिल्ली – बलिउड कलाकार सुशान्त सिंह राजपूतको आत्महत्यापछि उनकी प्रेमिका रियालाई सामाजिक सञ्जालमा दोषी देखाउँदै गाली आउने क्रम बढिरहेको छ ।

सुशान्तका बुबा केके सिंहले रियामाथि आरोप लगाएपछि सामाजिक सञ्जाल प्रयोगकर्ताले उनलाई तारो बनाइरहेका छन् । भारतीय मिडियाहरुले पनि रियाका बारेमा कैयन् समाचार प्रकाशन गरेका छन् ।

यसैबीच बलिउड कलाकार विद्या बालन रिया चक्रवर्तीको पक्षमा उभिएकी छिन् । उनले रियामाथि ‘घटिया कुरा’ भएको र यसले मन दुख्ने बताएकी छिन् ।

राजपूतलाई आत्महत्या गर्न उक्साएको र उनको पैसा खर्च गरेको भन्दै सीबीआईले रियामाथि सोधपुछ गरिरहेको छ ।

सामाजिक सञ्जालमा रियालाई अपराधीझैं व्यवहार गरेको प्रश्न उठ्ने गरेको छ ।

‘यो निकै दुर्भाग्य हो कि, हाम्रा प्यारा सितारा सुशान्त सिंह राजपूतको असमय मृत्यु मिडिया सर्कस बनेको छ,’ विद्याले ट्वीट गरेर भनेकी छिन्, ‘महिला हुनुको नाता, रियाको विरुद्धमा भएका घटिया कुराले मलाई चोट पुगेको छ, आऊनुस्, एक नागरिकको संवैधानिक अधिकारका लागि केही सम्मान देखाएर कानूनलाई आफ्नो काम गर्न दिऊँ ।’

विद्या बालनको यो ट्वीटपछि सामाजिक सञ्जाल प्रयोगकर्ताले लगातार उनलाई ट्रोल बनाउन थालेका छन् । उनलाई बहिष्कार गर्ने पनि फ्यानले बताएका छन् ।

यसअघि अर्की कलाकार तापसी पन्नुले पनि यसबारेमा आफ्नो धारणा सार्वजनिक गरेकी थिइन् । उनले ट्वीटमार्फत रिया चक्रवर्तीको समर्थन गरेकी थिइन् ।

उनले भनेकी थिइन्, ‘व्यक्तिगत हिसाबमा म न सुशान्तलाई चिन्छु, न रियालाई नै, तर यति मैले जानेकी छु कि, न्यायपालिकाभन्दा पहिले कसैलाई दोषी साबित गर्नु गलत हो, कानूनमा विश्वास गर्नुस् ।’