काठमाडौं- प्रहरीले सर्वस्वसहित जन्मकैदको सजाय तोकिएका फरार प्रतिवादीलाई कैलालीबाट पक्राउ गरेको छ ।

जिल्ला प्रहरी कार्यालय कैलालीको टोलीले कैलारी गाउँपालिका–५ घर भएका ४८ वर्षीय पुरणप्रसाद कुमाललाई पक्राउ गरेको हो ।

२०६१ कातिकमा भएको कैलालीको कैलारी गाउँपालिका–५ बस्ने २३ वर्षीय रामबहादुर कुमालको हत्याको घटनामा संलग्न पुरणलाई कैलाली जिल्ला अदालतले ०६५ मा सर्वस्वसहित जन्मकैद गर्ने फैसला गरेको थियो ।

जिल्ला अदालत कैलालीको आदेशले पुर्पक्षका लागी थुनामा रहेका बेला ०६१ माघमा तत्कालिन विद्रोही माओवादीले कारागारमा आक्रमण गरेको मौकामा पुरण भागेका थिए ।

पुनरावेदन अदालत दिपायल र सर्वोच्च अदालतले पनि पुरणलाई जिल्ला अदालतले गरेको फैसला सदर गरेको थियो ।