काठमाडौं-  संविधानविद् डा भिमार्जन आचार्यले संसदलाई नै जानकारी नदिई अधिवेशन अन्त्य गर्नु मन्त्रिपरिषद् र राष्ट्रपतिको कदम संविधानको विरुद्ध रहेको बताएका छन् ।

यसरी आफूखुसी कामहरु गर्दै जाँदा संसदीय व्यवस्था नै खण्डित हुनसक्ने उनले बताएका छन् ।

बिहीवार प्रधानमन्त्री केपी शर्मा ओलीले आकस्मिक मन्त्रिपरिषद् बैठक बोलाएर संसद अधिवेशन अन्त्यको लागि राष्ट्रपति समक्ष सिफारिस गर्ने निर्णय गरेका थिए ।

राष्ट्रपति भण्डारीले तत्काल नै बिहीवार साँझ ५ बजेबाट संसदको दुवै सदनको अधिवेशन अन्त्य भएको भन्दै संसद सचिवालयमा सूचना पठाएकी थिइन् ।

यही राजनीतिक घटनाक्रमलाई लिएर संविधानविद आचार्यले सामाजिक सञ्जालमा लेखेका छन्-  “संसद्लाई कुनै थाहा जानकारी नदिई अधिवेशन अन्त्य गर्ने मन्त्रिपरिषद् र राष्ट्रपतिको कदम संविधानको बिरूद्धमा छ। संसद्लाई सरकारले यसरी आफू खुशी उपयोग गर्दै जाने हो भने संसदीय ब्यवस्थाको अवधारणा नै खण्डित हुन जान्छ।”

उनले संवैधानिक लोकतन्त्रमा सरकार संसद् र संविधान दुवैको अधिनमा बस्नुपर्ने बताएका छन्  ।