काठमाडौं- रौतहटको राजपुरमा इँटा उद्योगमा जिउँदै मान्छे जलाएको (१३ वर्षअघिको घटना)का आरोपी एक जनालाई  प्रहरीले पक्राउ गरेको छ ।

पक्राउ पर्नेमा राजपुर नगरपालिका-६ का ३४ वर्षीय शेष सरोज भन्ने शेष सराज रहेका छन्।

सोही घटनाका आरोपी नेपाली कांग्रेसका तत्कालीन सांसद अफताब आलम हाल मुद्धा पुर्पक्षका लागि कारागारमा छन्। उनीपछि अर्का प्रतिवादीलाई प्रदेश-२ प्रहरीले गत महिना पक्राउ गरेको थियो।

प्रहरीले २०६४ सालको संविधान सभाको निर्वाचनको अघिल्लो दिन भएको घटनामा अनुसन्धान गर्दै गत वर्ष आलमलाई पक्राउ गरेको थियो। आलमसहित ११ जनाविरुद्ध मुद्धा दर्ता भएकामा अझै ८ जना फरार छन्।

आलमले भोलिपल्ट हुने निर्वाचनमा धाँधली गर्न स्थानीय इद्रिस शेखको गोठघरमा बम बनाइरहेको बेला विस्फोट भएको र त्यसपछि मृतक तथा घाइतेलाई नजिकैको इटाभट्टामा लगेर हालेर मारेको आरोप लागेको छ।