ललितपुर- ललितपुर महानगरपालिकाले महानगर क्षेत्रभित्रका किराना पसल, फलफूल तथा दैनिक उपभोग्य सामग्री बिक्री गर्ने पसलहरुलाई अनिवार्य रुपमा मूल्य सूची राख्न निर्देशन दिएको छ ।

महानगरपालिकाले बिज्ञप्ति जारी गर्दै उपभोक्ताले देख्नेगरी मूल्य सूची  राख्न निर्देशन दिएको हो ।

मूल्य सूची भए- नभएको अनुगमन सम्बन्धित वडा अध्यक्ष र सदस्यहरुले गर्ने बिज्ञप्तिमा उल्लेख गरिएको छ । बिज्ञप्तिमा भनिएको छ, ‘मूल्य सूची राखेको नपाइएमा कानुन बमोजिम कारबाही गरिनेछ ।’

कोरोना भाइरसको संक्रमण फैलन नदिन नेपाल सरकारले गरेको लकडाउनको निर्णय पछि बजारमा कृत्रिम अभाव सिर्जना भएको जनगुनासो प्राप्त भएसँगै महानगरल मूल्य सूची राख्न महानगर क्षेत्रका पसलहरुलाई निर्देशन दिएको हो ।

त्यसैगरी महानगरले विभिन्न संघसंस्था एवं गैरसरकारी संस्थाले खाद्यान्न सामाग्रीहरु राहतको रुपमा वितरण गर्दा महानगरपालिकाको सम्बन्धित वडा कार्यालयको स्वीकृति लिएर मात्रै गर्नुपर्ने विज्ञप्तिमा उल्लेख छ ।