काठमाडौं – कोरोना भाइरसका कारण बृद्धबृद्धा र वालावालिका बढी जोखिममा भनिरहँदा त्यस्तो तर्कलाई भारतीय एक दम्पतिले असत्य सावित गरिदिएका छन् ।

भारतमा सबैभन्दा बढी उमेरका कोभिड–१९ का संक्रमित दम्पत्ती संक्रमण मुक्त भएका छन् ।

कोरोना संक्रमित ९३ वर्षिय एक पुरुष र उनकी ८८ वर्षीया उनकी श्रीमती कोरोना मुक्त भएको उपचारमा संलग्न चिकित्सकले जनाएका छन् ।

दुबै जनामा करिब एक महिना अघि संक्रमणको पुष्टि भए पनि अन्तिम परीक्षणमा कोरोना नदेखिएपछि उनीहरुलाई घर पठाइने तयारी गरिएको छ ।

दक्षिणी भारतको केरला राज्यका दम्पत्ती आफ्नो छोरी र ज्वाईको सम्पर्कमा आउँदा कोभिड–१९ बाट संक्रमित भएका थिए । दम्पत्तीकी छोरी र ज्वाई इटालीबाट फर्केका थिए ।

बीबीसीका अनुसार संक्रमित पुरुष उच्च रक्तचाप र मधुमेहका बिरामी समेत थिए । विश्वब्यापी रुपमा उच्च रक्तचाप र मधुमेहका बिरामी कोभिड–१९ को संक्रमित भए मृत्युको जोखिम उच्च रहने अनुमान गरिएको छ । उनलाई २४ घण्टासम्म भेन्टिलेटरमा राखेर उपचार गरिएको थियो ।

संक्रमित दुबैजनालाई केरलाको कोट्टायम मेडिकल कलेज तथा शिक्षण अस्पतालमा भर्ना गरिएको थियो ।