काठमाडौं –  कोरोना भाइरस महामारीले ब्रिटेनको ग्लास्गोमा नोभेम्बरमा तय भएको जलवायु सम्मेलन स्थगित भएको छ ।

अब यो सम्मेलत महामारी नियन्त्रणमा आए आगामी बर्ष सन् २०२१ को जुन वा जुलाईतिर हुने बताइएको छ ।

ब्रिटेन र संयुक्त राष्ट्रसङ्घका अधिकारीहरूले इन्टरनेटमार्फत् एउटा भर्चुअल बैठक गरेपछि संयुक्त विज्ञप्ति जारी गर्दै नोभेम्बर ९ मा तय भएको बैठक यो बर्षलाई स्थगित गरिएको घोषणा गरेका हुन्।

जलबायु परिवर्तनसम्बन्धिका बिषयमा बार्षिक रुपमा छलफल हुँदै आएका यस्ता बैठकमा दर्जनौं मुलुकका नेताहरु सहभागी हुँदै आएका छन् । यो पटकको राष्ट्रसङ्घीय वार्षिक भेला कोप-२६ मा पनि दर्जनौँ विश्व नेताहरू सहभागी हुँदै थिए ।

जलवायु परिवर्तनबारे निकै महत्त्वपूर्ण पेरिस सम्झौता भएको पाँच वर्षपछि देशहरूले परिस्कृत जलवायु रणनीति ग्लास्गो सम्मेलनमा प्रस्तुत गर्ने अपेक्षा गरिएको थियो ।

स्कटल्याण्डको ग्लास्गो शहरमा सम्मेलनको लागि प्रतिनिधिहरू, पत्रकार र वातावरण अभियानकर्ता गरेर झण्डै ३० हजारको सङ्ख्यामा मानिसहरू भेला हुँदै थिए।

महत्त्वपूर्ण वार्ताहरूको आतिथ्यता गर्ने ग्लास्गोको स्कटिस इभेन्ट्स क्याम्पस अब कोभिड-१९ का बिरामीका लागि अस्थायी अस्पतालको रूपमा परिवर्तन गरिँन थालिएको बीबीसीले जनाएको छ।