काठमाडौं– प्रहरीले भक्तपुरको सूर्यविनायक–५, निकोशेरामा रहेको ग्लोरी इंलिस स्कुलको यूकेजीमा पढ्ने ६ वर्षीया बालिका गृष्मा राउत (नाम परिवर्तन) को अपहरणमा संलग्न एक जना पक्राउ गरेको छ ।

पक्राउ पर्नेमा सर्लाहीको लालबन्दी–५ घर भइ बोडेमा बस्ने २० वर्षीया आशिष थापा रहेका छन् ।

महानगरीय प्रहरी आयुक्तको कार्यालय, रानीपोखरीका अनुसार अपहरण भएको ५ घन्टापछि महानगरीय अपराध अनुसन्धान महाशाखा, टेकु र महानगरीय प्रहरी वृत्त, ठिमीको टोलीले उनलाई पक्राउ गरेको हो ।

थापाले फिरौती वापतको रकम ठिमीमा रहेको भाटभटेनीमा ल्याएर दिन भनेका थिए । सोही क्रममा उनलाई उनालाई पक्राउ गर्न सफल भएको प्रहरीले जनाएको छ ।

अपहरणकारीले बालिकालाई अपरहरण गरेर सूर्यविनायकको घ्याम्पे डाँडा लगेका थिए । बालिका पछाडि हात बाँधिएको अवस्थामा फेला परेकी थिइन् ।

प्रहरी अनुसन्धानका क्रममा अपहरणकारीले ती बालिका रोइकराइ गर्न थालेपछि घुम्न आएका मानिसहरुले थाहा पाउने डरले बालिकालाई जंगलमै छाडेर भागेको खुल्न आएको छ ।

बालिका जंगलमा रोएको देखेर घुम्न आउने मानिसले सोधपुछ गर्दा उनले स्कुलको नाम बताएपछि सर्वसाधारणले उनलाई स्कुलसम्म छाडिदिएका थिए ।